شخشوخة مسيلية
 |
| شخشوخة مسيلية |
شخشوخة مسيلية
مقادير العجين : دقيق رطب من النوع الجيد لي يكون فيه العلك +كمشة فرينة +ملح +ماء أعجني و أدلكي كيما عجين المحاجب و خليه يرتاح
ممبعد قطعيه كويرات صغيرة قد حبة الجوز خطرش رايحين نديرو ب 2 طبعا إستعملي الزيت ... في الصورة يبانو كبار بصح هما صغار و أطلقوا كي إرتاحوو
هنا تبداي حطي الطاجين يسخن على نار هادئة
حطي كويرتين فوق بعض و ديري بيناتهم الزيت و أبداي تحلي رقيق وهزيها حطيها فوق الطاجين و غير تشوفيها نشفت أقلبيها رايحة تنتفخ
و تقعدي تقلبي حتى تشوفيها طابت مالازمش تتحرق أو تيبس
ممبعد نحيها و حطي أخرى طيب و هكذا
طبعا لي طيبيها لازم تفتيها يعني تقطعيها بسرعة باش ماتبسش ممبعد تجيك صعيبة المهم لازمك اتقرصي القرصة و طيبيها و تفتيها في نفس الوقت وإذا عندك البنات أو لي يعاونك نقولك ياسعدك هههه أعطيهم يفتولك
نجو للمرق ساهل :
نحتاجو قطع لحم أو دجاج
بصل كمية مليحة وكل ماكان المرق بزاف كل مانزيدو البصل بزاف و أنا عائلة صغيرة عملت 3 بصلات متوسطين و 3 سنات كبار ثوم المهم هي تحب البصل بزاف
2 حبات طماطم حب مرحية
قليل من الزيت، ملح. ملعقة أكل فلفل أحمر مرحي و لي يحب الحار يزيد
قطعة صغيرة سكر أو ملعقة قهوة باش يوزن حموظة الطماطم
حمص منقوع ، طماطم علب ، كسبر أخضر و فلفل أخضر
نرحي البصل خشن او نهرسة في المهراس و الثوم و الطماطم الحب و نفرغ على اللحم +نحط ملعقة فلفل أحمر +ملح +سكر+الشحم +الحمص +شوية زيت+طماطم علب+و نحمص كلشي مليح مليح تم نمرق و ندير قليل من الحشيش مقطع و نغلق الكوكوطة تطيب حتى يطيب اللحم
ننزع اللحم ثم نشوف المرق تاعي ادا كان قليل نزيد نمرق بماء سخون نعطر المرق أو الكسبر المرحي و نزيد الحشيش و الفلفل الأخضر و3 فص ثوم مرحي نشقه و نرميه في المرق و هذه هي مرقتنا وجدت
أما ادا خدمتي الفتات أو الرقاق أو الشواط نهار من قبل فلازم نفوره شوية فقط قيس ما يسخن فقط لانه يتعجن و نغطيه
نجو لطريقة التقديم
نجيبو قصعة أو طبسي عريض نحط قليل من المرق و نحط فوقه القليل من الرقاق ثم نسقيه بالمرق ثم نحط الرقاق ثم نزيد نسقيه و هكذا حتى نكمل و نعمر الطبسي
او نضع المرق في كسرونة و نحط فوقو الفتات و نخليه تغلي شوي حتى تتشرب المرقة و نحطوه في صحن من الاحسن يكون تاجرة او قصعة خشب يعني تقليدي باش تزيد البنة بنتين و نزين بالحمص و الدبشة و الفلفل المقطع و اللحم و نقدمها مباشرة مالازمش تقعد مدة طويلة لانها تبرد و تنشف و تروح بنتها
ليست هناك تعليقات:
إرسال تعليق